Materi Menyimak Kelas X Semester 1 (Piwulang 2)

A. Menyimak

     (Nrungokake Crita Pengalaman)

   Ngruokake crita pegngalaman iku bisa dadi kegiyatan sing nyenengake. Saka crita pengalaman bisa dipethik piwulang luhur lan bisa dadi panglipur. Kabeh wong urip temtune duwe pengalaman. Pengalaman iku ana sing seneng lan ana sing susah, ana sing medeni lan ana sing lucu. Dadi, pengalaman iku isine macem-macem sifate. Gatekna tuladha pengalaman ing ngisor iki !

Salah Nggandheng

            Saben wulan Mulud ing kraton Sala mesthi ana upacara sekaten utawa grebeg. Ing wektu iku uga ana pasar malem sing isine tontonan, wong bebakulan maneka warna sing njalari ramening kahanan, sing padha nonton jejel riyel nganti suk-sukan. Nalika iku wanci sore, aku lan kancaku merlokake nonton. Anggonku mlaku tansah gandhengan jalaran sumelang yen pisah, angel anggone nggoleki. Saben anjungan dak leboni mung perlu nonton-nonton, bisa nambah pengalaman. Metu saka anjungan ora lali tansah nggandheng kancaku. Amarga saka ramening kahanan, aku ora nglegawa yen sing dakgandheng iku jebul wong liya. Sing ndhadekake aku anyel campur isin, wong liya mau dakgandheng mung meneng wae, sajake pancen njarag. Kancaku ngempet ngguyu ana mburiku. Wong sing dakgandheng mau saben-saben dakajak omongan kok mung meneng wae ? Kancaku sing ana mburiku ngguyu kemekelen. Aku kisinan, kancaku dakgoleki dene ora gelem ngomong yen kleru nggandheng.

(Basaku Basamu Basa Jawa, Pusakamas, kaca 22)

Pit-Pitan ing Dina Minggu

Dina Minggu wingi, aku pit-pitan karo Narti lan Bayu. Aku budhal saka omah watara jam enem esuk. Narti lan Bayu padha numpak pit gunung, dene aku numpak pit BMX. Pit-pitan iku bisa diarani olahraga. Malah bisa kanggo ngganti Senam Kesegaran Jasmani. Loro-lorone bisa kanggo njaga kuwarasane raga.

            Pit BMX-ku dakonthel alon-alon. Lakune ora sepira banter. Sedhela-sedhela aku, Narti, lan Bayu nyekakak ngguyu. Nurut dalan, aku sakanca pada crita sing lucu-lucu. Sunare srengenge wis krasa anget. Ing dalan wiwit akeh wong padha pit-pitan. Saliyane kuwi ana kang padha mlayu esuk, lan ana uga kang mlaku-mlaku. Atiku seneng banget bisa bebarengan rame-rame olahraga. Aku, Narti, lan Bayu terus nggenjot pit alon-alon. Ora krasa jebul wis adoh, kira-kira 5 km. Narti banjur ngajak leren dhisik. Karo lungguhan aku age-age ngombe. Kebeneran aku ngggawa banyu putih saka omah. Sawise ngombe, awak dadi seger. Rasa ngelak ilang sanallika. Aku lan kanca banjur muter pit saperlu bali menyang omah. Nanging bocah telu padha lali dalane. Narti lan Bayu bingung. Aku ora kelangan akal. Aku nyedhaki omah sing ana tulisane Ketua RT. Aku banjur njaluk tulung supaya dituduhake dalane. Sajake aku isin, apa tumon ing desane dhewe ora ngerti dalane. Pungkasane aku, Narti, lan Bayu nggenjot pit nuruti dalan sing dituduhake Pak RT.

(Remen Basa Jawa, Erlangga, kaca 4)

Wenehana panemu utawa pendapatmu tumprap isine wacan kang wis diwacakake magepokan karo basa lan isine !